Euskara eta Digitalitatea Graduondokoa

LABURPENA

UEUren Euskara eta Digitalitatea Graduondoan irakasgai baten arduradunak gara: « Gazteen eta aisialdiaren ikuspegia ».
Testuinguru digitalean euskara sustatuko duten aditu eta arituen beharra dugu askotariko alorretan, eta horretarako prestakuntza eskaini nahi du online graduondoko honek. Eskuragarri dauzkagun tresna eta baliabide digitalak ezagutarazteaz gain, gogoeta piztea eta euskararen zaintza eta sustapen teknologikorako estrategiak lantzea da helburua. Gure irakasgaian, zehazki, gazteen aisialdiari erreparatzen zaio. Hizkuntza-ohituren aldaketarako estrategikoak izan daitezkeen palankak identifikatu eta horietan eragiteko proposamenak lantzen dira.

Euskararen eta euskal gizartearen erronkez eta beharrez hitz egin, irakurri, entzun eta eztabaidatzera ohituta gaude, sarriegi aldez aurretik ezarritako mugen baitan. Jolasek eta jokoek ohiko parametroetatik kanpo kokatu eta ludikotasunaren praktika eta esperientziaren bidez bestelako ikuspegi, prozesu eta dinamika batzuetan murgildu eta hausnarketarako baliabide garrantzitsuak eskaintzen dizkigute. Proiektuak ludikotasunaren potentziala hausnarketa indibidual eta kolektiboaren zerbitzura jartzea proposatzen du.